معتقدات حلبية

هي الأقوال أو الأفعال كان يعتقد بها بعض أهالي مدينة حلب قديماً - ولا يزال بعضها مستمر إلى الان ولكن بدون الاعتقاد بها.
1. إذا أجا واحد بده يبرك على الكرسي والكرسي وقع بكون هالزلمه مغضوب
2. إذا اجتمع بمكان واحد تلت (ثلاث) أشخاص اسمن واحد بطلع على وجّن كنز
3. إذا ارتعبت الأم بينقطع حليبا
4. إذا اشترى حدا مكنسة نهار نص شعبان ما بصير يدخلا من باب الصقاق ( باب البيت ) لازم يقلبا من عالسطوح حتى ما يكنّس رزقو
5. إذا التبس التوب على قفاه بيبطّل مفعول السحر
6. إذا انحرقت قرمة المكنسة بموت صاحب البيت
7. إذا انفطم الولد في المربعينية بسحل صرمو
8. إذا انكتب الكتاب قبل نص الشهر ما بعود بصير وفق
9. إذا تأخر حدا عن ميعاد جيته وردنا يجي أوام لازم ننكّس المكنسة في البيت ونشكشكا بالدبابيس وهي منكّسة ونقول ونحنه عم نشكشكا : تحتك عود وفوقك عود ما يجيك صبر ولا قعود ، إن كنت بارك يقوموك وإن كنت ماشي يركضوك
10. إذا ترك المقص في البيت مفتوح بصير في البيت شرور
11. إذا حدا انحسد لازم يبخروه بقراني حصيرة البيت
12. إذا حدا حرّك النار بالسكينة بيتجروح ورا أدنيه
13. إذا حدا دوّر الطاحونة على الفاضي بصير غلا
14. إذا حكوك حواجبك بكون بده يجي غايبك
15. إذا درنا السجادة من طرف لطرف بتتيسر الجازة
16. إذا راحت العروس لعرس غيرا ما بعود بجيّا أولاد
17. إذا رجف لسان اللمبة بكون حدا عم بحكي بقفانا
18. إذا ردت تعطي الصابونة لازم تحطّا على ضهر كفك حتى ما يصير بينك وبين اللي عطيتو ياها زعل
19. إذا ركبت فردة القندرة فوق فردة بكون معناها قدامك سفر مستعجل
20. إذا زقزقت العصافير في الحوش بكون عم ببشروا بزيارة خطّار
21. إذا سافر عزيز ما بصير تكنس البيت حتى يرجع
22. إذا شافوا لكّة على التوب المخبا بكون الجان استعاروه ولبسوه
23. إذا شعلت سيكارة من زيق (طرف ) واحد والزيق الثاني ما شعلت بكون –والله أعلم –عاشق ومديون
24. إذا شفت حدا عم بحسدك قوم وقروص فخدك
25. إذا شقّيت (زرت) على مرضان يوم التلاتا (الثلاثاء) بموت المرضان ....
26. إذا صاحت البومة لازم نقول : الله يعطينا خير هالليلة
27. إذا صار معك رشح ، زت في الدرب صرة ملح واللي بياخدا بياخد رشحك
28. إذا صبينا مي غيلية لازم نزقزق ( يعني نبوس الجن ) وبعدا نصيح دستور يا حاضرين
29. إذا ضربت الأرض بعصايتك بتتكسر روس الجان
30. إذا طار من لقن العجين شقفة عجين بكون بدو ياكل من خبزو خطّار
31. إذا طلعلك حبة على راس لسانك بكونوا نسفولك عشاك
32. إذا عاش الإنسان 125 سنة بينبت لو أسنان جدد متل الأولاد
33. إذا غسّلنا فناجين القهوة والضيف في البيت بغط وما بعود ببين إلا بعد زمان طويل
34. إذا غسلت القطة وجا (وجهها) بكون بده يجي على البيت خطّار ( ضيوف )
35. إذا غسلنا فناجين القهوة قبل ما يروحوا الخطّار ما منعود منشوفن
36. إذا فارت القهوة وانكب منا بكون بدو يجيك رزقة
37. إذا تفشكلت وانته ماشي بكون عليك ندر ما وفيتو
38. إذا كركر (حكى) الصبي كتير مع البنات بتصير دقنو عوجا
39. إذا كنت عم بتشوف منامات بشعة حط تحت مخدتك سكينة
40. إذا نجا حدا من خطر يقولون : انكتبلو عمر جديد
41. إذا نسي الي عمياكل ( الذي يأكل ) وحط ايدو علأرض بتاكل معو الجان
42. إذا نشّف واحد وشو أو ايديه ببشكير غيره بصير بيناتن عداوه
43. إذا هزّينا سرير الطفل وما كان هوه فيه بوجعو ضهرو
44. إذا واحد عد المصاري أو غيرا بتطير بركتها ( المصاري : المال )
45. إذا وحدة عم بتشتري قماش ووقع عليها توب بتكون عليها ندر
46. إذا وقعت الصابونة على الأرض بلحسا الشيطان
47. أطول البشر أعوج بن عناق اللي كان عايش شمالي حلب في برية دركوش
48. أكل البزر الني بربي الدود في البطن
49. أكل البطيخ بقشره بينفع
50. أكل الزعتر يزيد من ذكاء الولد
51. أكل العسل والسمن بطوّل العمر
52. ابن الحلال عند ذكرو ببان
53. اقتناء حجلة في البيت يمنع القرينة
54. الأشقر بكون سريع التأثّر
55. الأصابيع الخمسة بترد العين
56. البتحكي حكاية بالحمام بتضيع ابنا
57. البتشردق بكون بده يجيه أرمغان من بخيل
58. البحكي مع حالو بجن
59. البشوف الهلال على مصاري أو على وج(وجه) حلو بكون شهرو خير وبسط
60. البنت اللي بتتجوز بشهر صفر ما بتحبل
61. البنت اللي بتكنس وما بتنظف بجيّا جوز أقرع
62. الجازة يوم التنين (الاثنين) بتموت الولاد (الأولاد)
63. الحبلة إذا اشتهت على أكلة وما أكلتا بتطلع صورة هالأكلة بجسم ابنا وبتتسمى الشهوة
64. الحية إذا قتلتا ما بتموت إلا حتى طلوع النجم
65. الخرزة الزرقا بترد العين
66. الزلحفة في البيت بتمنع القرينة
67. السباعي بكون عجول لأنه وُلدَ عجول قبل موعده بشهرين ( السباعي :المولود الذي ولد وهو في الشهر السابع من الحمل )
68. العقيق يجلب الرزق والخير والصديق
69. العنزةاللي بتاكل عفص بطلع بجلدا
70. اللي بتبكي وبتنام بطلع لها شعر جوات عيونا
71. اللي بتحنّا بعيد الضحايا بلاقي بسنتو لقايا
72. اللي بتحنّا يوم الوقفه بالجامع الكبير بجيه لقايا بسنتو
73. اللي بتشعل الضو قبل المغرب بتجيا جيجة الفقر
74. اللي بتعطّر شعرها كتير بشيب شعرها قوام
75 .اللي بحط الخبز تحت أباطه ما بتموت حماتو
76. اللي بحك أضافيرو في بعضن بتقاتل مع الناس
77. اللي بحكو وجهو بكون بدّه يبوسه حدا
78. اللي بدوس فوق حجر الطاحون بقصر
89. اللي بروح على الحمام وما لازمه حمام بتضحك عليه الجان
80. اللي بسف طحين بصير بقلبو دود
81. اللي بشوف في منامه جنازه بكون بده يتجوز
82. اللي بطّلع في المرايا بالليل بجن
83. اللي بطلع لو في الأكل درويش كبّه فاضي بكون بدو يتجوز –إن كان شاب – وبكون بدو يحج –إن كان ختيار
84. اللي بعزّل بيتو يوم الجمعة بفقر
85. اللي بقرقع بقبقابه في الليل بتعاوذوا منه الجان
86. اللي بقص أضافيرو وبيرمييا على الأرض بتقل هيبتو
87. اللي بقص أضافيرو يوم السبت بياكل أتل (ضرب) طول الجمعة
88. اللي بقص أظافيره ببيت غيره بضربو الدكش
89. اللي بقطب توبو وهو لابسو بتجيه الرزية
90. اللي بكب عالأرض ملح بطلع لو عروق ملح
91. اللي بكتر من شم الدفلة بطرش
92. اللي بكنس في الليل بكنس رزقو
93. اللي بكون بكر أولاده بنت بكون مرزوق
94. اللي بياكل تلت كعاب جبنة ولو زغار بنقرع
95. اللي بياكل جوز كتير بينقرع
96. اللي بياكل حلو ليلة راس السنة بتكون سنته كلها حلوة
99. اللي بياكل سمك ولبن بجن
100. اللي بياكل فول بتيّس
101. اللي بياكل مالطنجرة بنزل بعرسو مطر
102. اللي بياكل وبنام بحكي بنومو
103. اللي بياكل وبيحكي بياكل معه الشيطان
104. اللي بيبرك على كرافيسه بختير قوام
105. اللي بيبرك وبحط رجل على رجل بتجيب أمو عجل
106. اللي بيحش جبنه كتير بنقرع
107. اللي بيشرب وما بمسح تمه بلحسو الشيطان
108. اللي بيصفّر بجمّع الشياطين
109. اللي بيطلع من بيته زاخم بنقطع رزقو
110. اللي بيطلعلو حبة سنة في وجهو بكون نهاره سعيد ومرزوق
111. اللي بيعد النجوم بطلعلو تالوله
112. اللي بيقعد على خرزة الجب بتجيه تهمه
113. اللي بيلبس توب جديد بعد الحمام هلتوب (هذا الثوب) الجديد بهتري قوام
114. اللي بيمسك شقرقة بجرب ( شقرقة : ضفدعة )
115. اللي بينفخ بوجه غيرو بجي للمنفوخ عليه أبو صفار

116. اللي ما بجيا ولاد لازم تبرك في خزانة الحمام
117 المرا اللي بتشرب قهوة قبل الأكل بحبّا جوزها
118. المرا اللي بتشلح جراباتا قبل ما تشلح ملحفتا ما بتجوّز بناتا
119. المرا اللي ما بتنظف بيتها بجيّا أولاد قرعان
120. المي فراق
121. الولد اللي أدنيه كبار بعيش عمر كبير
122. تشبيك الأصابع أو الايدين تعقيد للموضوع المطروح للبحث
123. جلد الديب وراس الغزال والطير القوال الأحمر يمنعوا القرينة
124. حك الكف الأيمن دليل على جيّة صاحب الدين
125. حكة الاجر(القدم) دليل السفر وركوب البحر
126. حكة كف الشمال دليل قبض المال
127. ذا كانت المرا عم تنشر غسيلا وغابت الشمس بكون جوزا ما بحبا
128. رفّة العين اليمين بكا وأنين , ورفّة العين الشمال فرح وإقبال
129. سن الديب برد عين الحاسد
130. شرا الصابون بشهر صفر حرام
131. شرب البيض صباحا بجلي الحس
132. شوفي هدا الولد شقد حلو طقطقي أصابيعك وطلعي حتى ما تصيبيه بالعين
133. طقطقة النار بتدل على أنو العدو عم بدبر مكيدة
134. طوق العقيق بمنع خفقان القلب
135. قرن الحية برد عين الحسود شوفة الحية في الصبح تجارة وفي الظهر خسارة وفي المسا تقليعه مالحاره
136. كل أعور جكر وكل أقرع جكر

137. كيس المصاري ترى فيه فولة يابسة وودعة وخرزة زرقا
138. لا تبلع العجو بطلع شجرو بقلبك
139. لا تضرب بوز صباطك في صفّة العتبة حتى ما تولول الجان
140. لا تنشف بمنشفت غيرك بتصير بيناتكن عداوه
141. لا تهدي لمسافر وردة لأن معناها : روحه بلا ردّه
142. لاتفشّخ من فوق الولد حتى ما يقصر
143. لاتنفخوا بوج الولد بصير لو أبو صفار
144. لاتوقفي فوق راس الولد بنشوص
145. لازم ننشل شوي من زوادة المسافر ليرجع قوام ( بسرعة )
146. ما بصير حدا يلعب بالسلاح الفاضي لأنه بدكو الشيطان
147. ما لازم حدا يمد راسه من تم الجب ليروح يسحبه شيخ الجب
148. مشان نبطل عمل السحر لازم نغسله بميت (بماء) بزر البقله أو نبخّر المسحور ببزر البقله وإذا شال معو المسحور شوية قطران بكون فك السحر أقوى وأقوى
149. مطر نيسان بطّول الشعر
150. مطر نيسان بطوّل الشعر
151. من تم لـ تم بتموت الأم
152. من شان نعرف الحبلة (الحامل) بدا تولد صبي إلا بنت بجيبوا مفتاح وبعلقوه عخيط وبخلوه في الهوا وبحركوه إذا دار بكون بنت لأنو البنت بتحب تدوّر وإذا تمايل هيك وهيك بكون صبي
153. من شان يشفى المريض لازم يبات في بيت جوّاتو قبر ولي
154. يا أولاد لا تلعبوا وتنطوا على فرد اجر كو بتغلى الحمطة ها
156. يزعمون أن الحنش يلحق الرجل اللي لابس أحمر وما بعيفو حتى يزت هالشي الأحمر
157. يقولون للصبي : لا تشرب قهوة بطلعوا شواربك عوج