رسالة من احد اللاجئين ولك يا عيد شو جابك..؟

زي كل الأعياد اللي بتمر ع الشعب الفلسطيني

دايما بيكون الاحتلال جاثم على قلوب الملايين

مانع عنهم الفرحة والبسمة زي ما بيمنع الدواء والغذاء..

بس برضو.. زي كل عيد..

في هاد اليوم الفلسطيني بيأكد ثباته وصموده..

في داخل وطنه وأرضه..!

لكن..

في كل سنة وعلى الطرف الآخر للحدود

سواءا مع سوريا او لبنان او الاردن او مصر

او حتى دول عربية وغربية ما بتربطها حدود بفلسطين المحتلة

في كل سنة،،

بنلاقي شريحة مهمة جدا

شريحة في معظم الأعياد بننسى شعورها .. او بنتغاضى عنه..!

هم..

اللاجئون الفلسطينيون

في كل بقاع الأرض

اجى العيد

وراح العيد

واجى عيد جديد

يا ترى كيف هم بشوفوا العيد وهم مبعدين قهرا عن أرضهم؟؟

تعالوا نقرا ونسمع:

:

:

:

:

:

:

:

:

:

:

:

ولك يا عيد شو جابك..؟

إجاني العيد يا يُما وانا بعيد

الكل بعيد يا يُما وانا بعيد

قصيد بْغني يا يما وانا بعيد

متى بَعود لدْيار الأحباب؟

وَلَك يا عيد شو جابك؟

بطلنا من أحبابك

ويومٍ تيجي بالفرحه

حتلقانا على بْوابك

وَلَك يا عيد شو جابك؟

وَلَك يا عيد روح ارتاح

وخَلْني مع أساي مْلاح

يا قلبي تعصفك الرياح

ولا حدٍ دري ما بَك

وَلَك يا عيد شو جابك؟

يا دوم بتيجي واحنا بعاد

ديار بواد واحنا بواد

متى نرجع يا عيد ولاد

ونفرح بيك وبثيابك

وَلَك يا عيد شو جابك؟

يا بيتي والله مشتاقلك

إلَك .. حيطانك واهلك

وانا بالغربه عَم بَهلك

مُنايْ اركع على عْتابك

وَلَك يا عيد شو جابك؟

وابوس ايدين هـ الحجِه

تا يعمر قلبي بالبهجِه

ومَتِّع عيني بالفُرجِه

ع أصحابي وأصحابك

واوصل تربتك يابا

واكحل عيني بترابا

ودمعي يِسكُب سْكابا

على اللي بغِيبِتي صابك

وَلَك يا عيد شو جابك؟

عساك تسامح دموعي

وتطفي النار بضلوعي

إلك يا ربي مرجوعي

تِحَلِّي مُري بطْيابَك

وَلَك يا عيد شو جابك؟

وتفرجها على الصابرين

وتجعل عيدِنا عيدين

بيوم العودة لفلسطين

تِمِنْ علينا بثَوابك

وَلَك يا عيد شو جابك؟

وَلَك يا عيد شو جابك؟

بطلنا من أحبابك

ويومٍ تيجي بالفرحه

حتلقانا على بوابك

وَلَك يا عيد شو جابك؟؟؟

وافر احترامي لكل لاجئ فلسطيني

وللجميع بالعموم

لاجئة

هذة رسالة لكل اهلي في فلسطين الحبيبة
ابنكم (باحث عن الحق) محمد