مشكلة لابد لها من حل...

موضوعنا اليوم عن الزواج (( او بالاحرى ما قبل الزواج )) .. كيف لما الشب المسكين المغلوب على امرو الماكل روح الخل الطفران العايف حالو الي معوش يوكل المصدوم عاطفيا و نفسيا و روحيا و جسديا بسب الغلاء و الوضع الحالي , لما يغلط و ينضرب على راسو و يحب بنت و يصير بدو يطلبها ...

طبعا الشب بيدخل على بيت البنت مع ابو (( الي مدمّع من الفرحة )) و أمّو (( الي مش عاجبيتها العروس قبل ما تشوفها )) , بدخل حامل باقة هالورد مبسوط و قلبو فيه شمعة حب للبنت مافي اي ظرف في العالم ممكن يطفيها ... بقعد بعد الترحيب و الترهيب ... ام العروس بتكون سالخيتها كشرة مع قرف " زي الي شامم ريحة .... " و ابو العروس بكون مبسوط على المكسب المادّي قصدي على مكسب الزلمة !!!! لانو اول ما تيجي العروس تضيف القهوة للناس , الأب بينط بحكي احنا بدنا نشتري زلمة ما بتهمنا الفلوس , طبعا هاي هي بداية المأساة العاطفية الي رح احكي عنها اليوم

الشب المسكين بيصدق ان الاب بدو يشتري زلمة مش فلوس , فبروح بغمز البنت على اساس انو ما في مشاكل و رح يقعدو تحت سقف واحد "بالحلال" قريبا جدا ... فجأة مع موسيقى تصويرية بتتحول معالم الاب من زلمة مبسوط الى مصاص دماء ما بيرحم لا رضيع ولا بنت ولا ختيار , و بتبدا الاسئلة الاستدراجية ... انت كم راتبك عمو ؟؟؟ بتقدر تشتري بيت على شط بحر غزة لبنتي ؟؟؟ ( عاد بكون سكان المخيم الله يرحم جدو ) , هل بتقدر تعيش بنتي في نفس العز الي كانت عايشة فيه ؟؟ ( مين عز ؟؟؟ ) , هل بتقدر تعمل خطبة و عرس و استقبال في فندق خمس نجووووم ؟ ( عاد هو و قرايبو بعرفوش شو يعني فندق ) , هل انت على قد المسؤولية و رح تعيش بنتي و حماتك احسن عيشة من بعدي ؟؟ ( شوووو بدك تموووت و تلبسني هم مرتك ؟؟؟ ) , كم ناوي تشتري دهب ؟ كم ناوي تدفع مهر ؟ كم ناوي تحط في رصيد بنتي ؟ كم حاطط ميزانية للموظوع كلو ؟ شو في عندك شغل اظافي ؟ كم رصيدك ؟ عندك املاك ؟ في ورثة ؟؟؟ ابوك رح يساعدك ( انو واااال مش بكفي انا كمان بدك تخووورف ابوووي ؟؟؟ ) ....

هون الشب بيفقد جميع انواع الاحاسيس الي عندو , الشمعة بتطفي , بحس بالاذلال ... بصير يشوف البنت و يحكي ( انا ادفع عليكي الوفات يا جربة ؟؟؟ ) اي اروووح ازبطلي بنت بخمسين شيكل بتكون رايحة ... ما تزعلو مني بس هدا هو الواقع !!!! و بتحكو ليش الشباب بيروحو للحرام بدل الحلال , مهو الحلال صار مستحيل , الحلال صار يكلف الاف الدنانير , و بيجو بحكولك احنا بدنا نشتري زلمة ما بتهمنا المصاري !!! اي زلمة الي بدكم تشترووو ؟؟؟ انتو بدكم تخورفووو تمصوو دمو تلعنو ابو الساعة الي اجا فيها على هاي الدنيا و الساعة الي حب فيها بنت و قرر يتزوجها " من الباب " و يجيب ولاد !!! ليش يجيب ولاد عشان يعيشو على خبز حاف ؟؟؟ لانو الاب بدو يسد ديونو الي صرفها عشان يعمل عرس بفندق خمس نجوم !! يا ريت اهالي البنات يتزكرو حالهم لما كانو شباب طفرانين زينا و بدهم يتزوجو !!!!

انا مش عم بشجع الحراام لا والله , الي بيصير في الشباب هو حرام , بيوخد راتبو بروح نصو ضرايب , و النص التاني عشان ما يموت من الجوع , فيا بنات و يا اهالي حسو في الشب و جد اشترو زلمة ( لانو الشب الي قعد سنين يشتغل و يصرف على حالو و اكل روح الخل و بيحكي الحمدلله في الاخر و بدو يتزوج هاد زلمة ) ,,, سيبو يتزوج , والله مش غلط ازا البنت اشتغلت زيها زي الشب و يتقاسمو كل شي , الزواج و البيت و العفش و الدهب , هيك رح يحبو بعض اكتر , و رح يعيشو عيشة بشر , سلااام بعرف طولت ...